ವಾಷಿಂಗ್ಟನ್ : ಭಾರತೀಯ ಮೂಲದ ವ್ಯಕ್ತಿಯೊಬ್ಬ ಅಕ್ರಮವಾಗಿ ಅಮೆರಿಕಾದಲ್ಲಿ ನೆಲೆಸಲು ನಕಲಿ ದರೋಡೆ ನಡೆಸುತ್ತಿದ್ದ ವಿಚಾರ ಬೆಳಕಿಗೆ ಬಂದಿದೆ. ರಾಂಭಲ್ ಪಟೇಲ್ ಎನ್ನುವ ವ್ಯಕ್ತಿ, ಯುಎಸ್ ವೀಸಾ ಪಡೆಯಲು ಅಕ್ರಮ ದಾರಿಗೆ ಇಳಿದಿದ್ದ. ಇದನ್ನು ಆತನೇ ಒಪ್ಪಿಕೊಂಡಿದ್ದಾನೆ ಕೂಡಾ.2023ರಿಂದ ಈಚೆ ಕನಿಷ್ಠ ಒಂಬತ್ತು ಇಂತಹ ಅಕ್ರಮ ಕಾರ್ಯಚಟುವಟಿಕೆಯನ್ನು ಈತನ ನಡೆಸಿದ್ದಾನೆ. ಈ ವಿಚಾರದಲ್ಲಿ ತಾನು ದೋಷಿ ಎನ್ನುವುದನ್ನು ಈತ ಒಪ್ಪಿಕೊಂಡ ಹಿನ್ನಲೆಯಲ್ಲಿ ಈತನಿಗೆ ಆಗಸ್ಟ್ 20ರಂದು ಶಿಕ್ಷೆಯ ಪ್ರಮಾಣ ಪ್ರಕಟವಾಗಲಿದೆ. U – ವೀಸಾ ಕಾರ್ಯಕ್ರಮವನ್ನು ದುರುಪಯೋಗಪಡಿಸಿಕೊಳ್ಳಲು ಈ ರೀತಿ ಮಾಡಲಾಗುತ್ತಿತ್ತು ಎಂದು ಒಪ್ಪಿಕೊಂಡಿದ್ದಾನೆ.ರಾಂಭಲ್ ಪಟೇಲ್ ಅಮೆರಿಕಾದ ನ್ಯೂಯಾರ್ಕ್ ಮೂಲದ ಭಾರತೀಯ ಸಂಜಾತ. ದೇಶಾದ್ಯಂತ ಅಂಗಡಿಗಳಲ್ಲಿ ನಕಲಿ ದರೋಡೆಯನ್ನು ನಡೆಸುತ್ತಿದ್ದ. ಈತನ ಉದ್ದೇಶ ಅಕ್ರಮವಾಗಿ ದೇಶದಲ್ಲಿರುವ ವಲಸಿಗರಿಗೆ ಯು-ವೀಸಾ ಪಡೆಯಲು ಸಹಾಯ ಮಾಡುವುದು. ಈ ವೀಸಾವು, ಅಪರಾಧಗಳಿಗೆ ಬಲಿಯಾದವರಿಗೆ ನೀಡಲಾಗುವ ವೀಸಾವಾಗಿದೆ.
ಈ ವೀಸಾವನ್ನು ಹೊಂದಿದ್ದರೆ ದೇಶದಿಂದ ಗಡೀಪಾರು ಆಗುವ ಶಿಕ್ಷೆಯಿಂದ ಬಚಾವ್ ಆಗಬಹುದಾಗಿದೆ. ಪಟೇಲ್ ಮತ್ತು ಆತನ ಸಹಚರರು ಸುಮಾರು ಒಂಬತ್ತು ಪ್ರಕರಣಗಳಲ್ಲಿ ಭಾಗಿಯಾಗಿದ್ದಾರೆ. ಡಿಸೆಂಬರ್ 2023ರಲ್ಲಿ ಈತನ ತಂಡದ ಮೇಲೆ ಆರೋಪ ಹೊರಿಸಲಾಗಿತ್ತು. ಇದೇ ಆಗಸ್ಟ್ ನಲ್ಲಿ ತೀರ್ಪು ಪ್ರಕಟವಾಗಲಿದೆ.ನಕಲಿ ದರೋಡೆಯು ಸಿಸಿಟಿವಿ ಕ್ಯಾಮೆರಾದಲ್ಲಿ ಸೆರೆಯಾಗಿದೆ. ದರೋಡೆಕೋರ ಆಯುಧವನ್ನು ತೋರಿಸಿ, ಹಣವನ್ನು ತೆಗೆದುಕೊಂಡು ಹೋಗುವುದು ಅದರಲ್ಲಿ ರೆಕಾರ್ಡ್ ಆಗಿತ್ತು. ಒಂದು ದರೋಡೆಗೆ ಬಲಿಯಾದ ವ್ಯಕ್ತಿಯೊಬ್ಬರು ಪಟೇಲ್‌ಗೆ 20,000 ಡಾಲರ್ (ಸುಮಾರು 17.43 ಲಕ್ಷ ರೂಪಾಯಿ) ನೀಡಿದ್ದಾರೆ ಎಂದು ಹೇಳಿಕೆಯಲ್ಲಿ ಉಲ್ಲೇಖಿಸಲಾಗಿದೆ.ಅಂಗಡಿ ಮಾಲೀಕರು ಸಹ ಈ ನಕಲಿ ದರೋಡೆಗಳಲ್ಲಿ ಶಾಮೀಲಾಗಿದ್ದರು ಎನ್ನುವ ಅಂಶವೂ ಪತ್ತೆಯಾಗಿದೆ. ಪಟೇಲ್ ಅಂಗಡಿಗಳನ್ನು ಬಳಸಲು ಪತ್ತೆ ಹಚ್ಚುವ ಮುನ್ನ ಮಾಲೀಕರಿಗೂ ಹಣ ನೀಡುತ್ತಿದ್ದರು. ಮಾರ್ಚ್ 2023 ರಲ್ಲಿ, ಪಟೇಲ್ ಮತ್ತು ಅವರ ಸಹಚರರು ಕನಿಷ್ಠ ಒಂಬತ್ತು ನಕಲಿ ದರೋಡೆಗಳನ್ನು ಮಾಡಿದ್ದಾರೆ. ಅವುಗಳಲ್ಲಿ ಐದು ಮ್ಯಾಸಚೂಸೆಟ್ಸ್‌ನಲ್ಲಿ ನಡೆದಿವೆ ಎಂದು ಯುಎಸ್ ಅಟಾರ್ನಿ ಕಚೇರಿ ತಿಳಿಸಿದೆ.
ಅಕ್ರಮವಾಗಿ ಅಮೆರಿಕಾದಲ್ಲಿ ವಾಸಿಸುತ್ತಿದ್ದ ಅಂಗಡಿ ಗುಮಾಸ್ತರು, ತಾವು ಹಿಂಸಾತ್ಮಕ ಅಪರಾಧಕ್ಕೆ ಬಲಿಯಾಗಿದ್ದೇವೆ ಎಂದು ಹೇಳಿಕೊಳ್ಳಲು ಈ ದರೋಡೆಗಳನ್ನು ಮಾಡಿಸಲಾಗುತ್ತಿತ್ತು. ಇದರಿಂದ ಅವರಿಗೆ ಯು ನಾನ್-ಇಮಿಗ್ರಂಟ್ ಸ್ಟೇಟಸ್ (U-ವೀಸಾ) ಸಿಗುತ್ತದೆ.U-ವೀಸಾವು ಒಂದು ನಿರ್ದಿಷ್ಟ ರೀತಿಯ ವೀಸಾವಾಗಿದೆ. ಇದು ಅಪರಾಧಕ್ಕೆ ಬಲಿಯಾದವರಿಗೆ ಸಿಗುವಂತದ್ದು. ಈ ವೀಸಾ ಪಡೆಯುವವರು, ಮಾನಸಿಕ ಅಥವಾ ದೈಹಿಕವಾಗಿ ತೊಂದರೆ ಅನುಭವಿಸಿರಬೇಕು. ಅಲ್ಲದೆ, ಅವರಿಂದ ಅಪರಾಧದ ತನಿಖೆಯ ವೇಳೆ ಪೊಲೀಸರಿಗೆ ಸಹಾಯ ಮಾಡಿರಬೇಕು. ಈ ವೀಸಾವನ್ನು 2000 ರಲ್ಲಿ ಪರಿಚಯಿಸಲಾಗಿತ್ತು. ಇದರ ಉದ್ದೇಶ ಅಕ್ರಮ ವಲಸಿಗರು ಅಪರಾಧಗಳ ಬಗ್ಗೆ ದೂರು ನೀಡಲು ಪ್ರೋತ್ಸಾಹಿಸುವುದು.ಕನಿಷ್ಠ ಇಬ್ಬರು ಸಹಚರರು ನಕಲಿ ದರೋಡೆಗಳ ಆಧಾರದ ಮೇಲೆ U – ವೀಸಾಕ್ಕಾಗಿ ಅರ್ಜಿ ಸಲ್ಲಿಸಿದ್ದಾರೆ. ಪಟೇಲ್ ವಿರುದ್ಧ ಡಿಸೆಂಬರ್ 2023 ರಲ್ಲಿ ಆರೋಪವನ್ನು ಮಾಡಲಾಯಿತು. ಅವರ ಸಹಚರ ಸಿಂಗ್ ಮೇ 22 ರಂದು ತಪ್ಪೊಪ್ಪಿಕೊಳ್ಳುವ ನಿರೀಕ್ಷೆಯಿದೆ ಎಂದು ಹೇಳಿಕೆಯಲ್ಲಿ ತಿಳಿಸಲಾಗಿದೆ. ವೀಸಾ ವಂಚನೆ ಮಾಡುವ ಅಪರಾಧಕ್ಕೆ ಗರಿಷ್ಠ ಐದು ವರ್ಷಗಳ ಜೈಲು ಶಿಕ್ಷೆ, ನಂತರ ಮೂರು ವರ್ಷಗಳ ಮೇಲ್ವಿಚಾರಣೆಯ ಬಿಡುಗಡೆ ಮತ್ತು 250,000 ಡಾಲರ್ ವರೆಗೆ ದಂಡ ವಿಧಿಸಬಹುದು.
ಪ್ರತ್ಯೇಕ ಪ್ರಕರಣದಲ್ಲಿ, ಕನೆಕ್ಟಿಕಟ್‌ನ ಫೇರ್‌ ಫೀಲ್ಡ್ ಕೌಂಟಿ ಪೊಲೀಸರು ಇಬ್ಬರು ಭಾರತೀಯ ಪ್ರಜೆಗಳನ್ನು ನಕಲಿ ದರೋಡೆ ನಡೆಸಿದ ಆರೋಪದ ಮೇಲೆ ಬಂಧಿಸಿದ್ದಾರೆ. ಪೊಲೀಸರು ಅಂಗಡಿ ಮಾಲೀಕ ಬೀರೇನ್‌ ಕುಮಾರ್ ಪಟೇಲ್ ವಿಚಾರಿಸಿದಾಗ, ಅವರು ದರೋಡೆಯು ನಕಲಿ ಎಂದು ಒಪ್ಪಿಕೊಂಡಿದ್ದಾರೆ.ಅವರ ಅಂಗಡಿಯ ಗುಮಾಸ್ತ ಲಕ್ಷಿತ್‌ ಕುಮಾರ್ ಪಟೇಲ್ U-ವಿಸಾ ಕಾರ್ಯಕ್ರಮವನ್ನು ಬಳಸಿಕೊಂಡು ಅಮೆರಿಕಾದಲ್ಲಿ ಉಳಿಯಲು ಸಹಾಯ ಮಾಡಲು ಈ ರೀತಿ ಮಾಡಲಾಗಿತ್ತು. ಗುಮಾಸ್ತನೇ ಪೊಲೀಸರಿಗೆ ಕರೆ ಮಾಡಿ ದರೋಡೆ ಬಗ್ಗೆ ಸುಳ್ಳು ದೂರು ನೀಡಿದ್ದನು ಎಂದು ಫೇರ್‌ಫೀಲ್ಡ್ ಕೌಂಟಿ ಶೆರಿಫ್ ಕಚೇರಿ ಹೇಳಿಕೆಯಲ್ಲಿ ತಿಳಿಸಿದೆ.
